abonneer nu
Wolvega

Ommedaenken veur Stellingwarver tael op De Heidepolle

Geplaatst op dinsdag 5 maart 2019 08:36
  • © Lenus van der Broek

  • © Lenus van der Broek

pinterestmail

Wolvege - Maendag 4 meert gongen op basisschoele De Heidepolle in Wolvege twie streektaelweken uut aende in et kader van Meert-Streektaelmaond.

Tiedens de beide weken is d’r veural ommedaenken veur de Stellingwarver tael, mar ok veur de eigen streekkultuur. In een goeie wisselwarking mit de schoele zorgde de Stellingwarver Schrieversronte veur een achttal aktiviteiten, waor een achttal kenners van de tael en kultuur an mitwarken.

Op de eerste morgen vertelde taelkundige Henk Bloemhoff – schriever van et Stellingwarfs Woordeboek en jaorenlaank streektaelfunktionaoris – over et Stellingwarfs, de aachtergrond en de biezunderheden daorvan. Dat dee hi’j veur de leerlingen van groep 4 t/m 8. Femmie van Veen las veur in groep 3 uut et boek ‘De hollebomebos’, over o.e. de vervelende streken van de hekse Krakkemikka. Bi’j beide onderdielen is zorgd veur verwarkingsmateriaol.

De tekst gaat verder na de foto.

  • gallerij afbeelding

    © Lenus van der Broek

Piepmoes en Muske Tiemen

Op deensdag 5 meert wo’n speciaol schreven verhaelties over Piepmoes verteld in groep 1 en 2, en gaot groep 6 an de slag mit een tenielstokkien in et Stellingwarfs. De dag d’r op gaot disse groep, onder deskundige leiding van Nelie Mulder-Winter, an de slag mit et oefenen d’r van. Veur dit onderdiel wodde een verhael van Jaap Sikkema ommewarkt tot een tenielstok.

Op 5 meert vertelt Christine Mulder in de groepen 4, 4/5 en 5 over heur wark as schriefster; in et biezunder over et kienderboek ’Muske Tiemen’. Niet alliend over de verhaelties, mar ok over de illestraosies die ze zels veur et boek maekte.

Johan Veenstra

Ok Johan Veenstra gaot naor de groepen 4, 4/5 en 5. Van him bin d’r mar liefst 28 boeken verschenen, en de leerlingen gaon him om die reden interviewen. Johan Veenstra vertelt ok over zien vertaeling van ‘Pake en Beppe Pluus’, een Nijntje-boekien in et Stellingwarfs.

De netuur in en foto’s

Groep 6/7 gaot op 6 meert op netuurexkursie mit netuurkenner Freddie de Vries. Veurofgaonde an de exkursie lat de auteur van et ‘Stellingwarfs Voegelboek’ eerst een PowerPoint zien, die hi’j speciaol ontwikkelde veur disse morgen. Op diezelde dag komt fotograaf Lenus v.d. Broek an groep 8 vertellen over et maeken van foto’s. Disse les is een veurbereiding op een biezundere kultuurhistorische exkursie op 7 meert.

Volksverhaelen en kultuurhistorische exkursie

Op 7 meert gaot groep 7 an de slag mit Stellingwarver volksverhaelen. Daorveur kriegen de leerlingen een film te zien over et ontstaon van De Lende, zoas dat lange leden warkelik gebeurde, mar ok hoe et neffens twie Stellingwarver volksverhaelen gebeurd wezen zol. Ok bi’j dit lesonderdiel bin een peer lesopdrachten ontwikkeld.

Kultuurhistorische kuier

Geert Lantinga, Lenus van der Broek en Grietje Bosma-Dijkstra gaon op diezelde dag een kultuurhistorische kuier deur Wolvege maeken. Kenner van Wolvege Geert Lantinga het veur disse dag een speciaole route uutstippeld. De leerlingen van groep 8 gaon an de haand daorvan bekieken wat zi’j now van belang vienen om zunig mit te wezen en om te beweren veur meensken die over een hiele poze in Wolvege wonen zullen. Van die gebouwen, straoten, biezundere plakken of netuur maeken ze onderwegens foto’s. De weke d’r op gaot de groep o.l.v. Grietje Bosma en Geert Lantinga een verslag schrieven. Et doel is dat een tal van die verhaelen mit foto’s ok warkelik publiceerd wodden zullen.

whatsappTip de redactie via WhatsApp! Voeg 'Stellingwerf' toe als contact in uw telefoon, 06-3068 9713, en stuur ons uw tips, foto’s en video’s.